"เทพทันใจ" : องค์หลวงปู่น้อย ญาณวโร

"เทพทันใจ"

"...เทพทันใจเจ้าของนี่บ้อ... บุญกุศลเจ้าของนี่ล่ะ เฮ็ดบุญเจ้าของหลายแล้วมันกะคือ "เทพทันใจ" เทพกะคือสิ่งที่ดี สิ่งที่ดีนี่มันเกิดขึ้นด้วยบุญด้วยกุศลที่เกิดจากการทำดีในศาสนาพุทธ เทวดาที่ดลได้กะคือ เทวดาในศาสนาพุทธเด้ล่ะลูก เป็นสัมมาทิฏฐิ ซ่อยกันพ่อกะบ่ว่า ท้าวสักกะท้าวมหาพรหมท้าวจาตุมมหาราชทั้งสี่ เทพทั้งหลายที่ซ่อยในพุทธศาสนากะมีหลาย ไม่ใช่ว่าเพิ่งจะมี มันมีตั้งแต่ไหนแต่ไรมา ใช้คำว่า "ทันใจ" เอ้อ...กะเพราะว่าบุญมันหลายแล้ว ซ่อยกันอยู่หรอก เทพในสามแดนโลกธาตุที่เป็นสัมมาทิฏฐิก็ซ่อยลูกซ่อยหลานอยู่ บ่ได่ว่าเด้ลูกให้ซ่อยกัน พวกวิญญาณที่เป็นสัมมาทิฎฐิกะซ่อยกันซั่นล่ะ บ่ซ่อยกัน ไผสิซ่อยเฮาเนาะ ชาวพุทธๆ นี่กะคือมนุษย์ วิญญาณด้วยเทวดาด้วยพรหมด้วย พญาครุฑพญานาคด้วยนั่นล่ะ คั่นบ่ซ่อยกันไผจะซ่อยเฮาลูก เทวดากะซ่อยกัน พวกพรหมกะซ่อยกัน พญานาคพญาครุฑกะซ่อยกัน

...แต่ว่า เฮาบ่ได้เอาพวกนี้เป็นสรณะ !!
พวกพญาครุฑพญานาคกะเอาพระพุทธพระธรรมพระสงฆ์เป็นสรณะ
เทวดากะเอาพระพุทธพระธรรมพระสงฆ์เป็นสรณะ
พวกพรหมกะเอาพระพุทธพระธรรมพระสงฆ์เป็นสรณะ
เฮากะเอาพระพุทธพระธรรมพระสงฆ์เป็นสรณะ

เฮาจึงกราบพระพุทธพระธรรมพระสงฆ์ร่วมกัน บ่แม่นว่าสิไปทำลายกันหรือว่าไปดุด่าว่ากล่าวกัน หรือไปประมาทกันหรือไปกราบกันเป็นอาจารย์ "มันบ่แม่น" ต่างฝ่ายกะต่างเป็นสัมมาทิฏฐิซ่อยกันฮั่นตั่วะ เทพทันใจ เทพ...อิหยังกะว่ากันไปฮั่นตั่วะ มันกะซื่อของเพิ่นนั่นล่ะ กะมีในมหาสมัยสูตรนั่นหน่ะ เทพชื่อนั่นเทพชื่อนี้มากราบพระพุทธเจ้ามีบริวารถ่อนั่นถ่อนี้ พักอยู่ที่นั่นที่นี้ เอ้อ..พระพุทธเจ้าเพิ่นบัญญัติไว้หมด อันนี้เฮาบ่เข้าไปก้าวก่ายเด้...

เทวดากะซ่อยกันซั่นตั่วะลูกในแสนโกฏิจักรวาลนี่

แต่...ที่เฮาห้าม !!
สิไปบวงสรวงเซ่นไหว้ด้วยเหตุที่ว่า กลัวว่าสิพ้อ พวกมิจฉาทิฏฐิ พรหมมิจฉาทิฏฐิ เทวดามิจฉาทิฏฐิ พญานาคมิจฉาทิฏฐิ เจ้าพ่อเจ้าแม่มิจฉาทิฏฐิ...
เฮา สิ ตกระกำลำบาก นั่น
พวกมารพวกนี้สิเข้าไปสิงเฮาปั๊บ เมื่อเข้าไปสิงเฮาปั๊บ กะไปเด้บาดนี้ ไปทางบ่แม่นเด้บาดนี่ มันบ่แม่นธรรมดาเด้บาดนี่ เขาเรียกว่า "มารดลใจ" นี่กะมีในสมัยพุทธกาลเด้ นี่ไม่ใช่ว่าพ่อพูดเอาเด้ลูก เดาเอาเด้ ที่พ่อพูดขึ้นนี่ ค้านพ่อไม่ได้เด้

ก็เหมือนที่ว่าพระพุทธเจ้าไปบิณฑบาตรนี่ พวกมารเข้าไปดลใจพวกอุบาสกอุบาสิกาไม่ให้ใส่บาตรพระพุทธเจ้าเลย มารดลใจพระอานนท์ไม่ให้พูด ไม่ให้อาราธนานิมนต์พระพุทธเจ้า นั่น มารพวกนี้มันก็เข้าไปครอบงำหมดนะลูกนะ ลูกจะไปกราบไหว้พวกเปรตพวกผีพวกมารทำไม มารคือตัวทำลายตัวทำร้าย ตัวที่ฆ่าตัวที่ทำลาย เมื่อมารมันไม่ดีแล้วลูกจะไปกราบไปไหว้ทำไม ใช่ไหมล่ะ ลูกก็กราบไหว้พระพุทธพระธรรมพระสงฆ์ นี่เทวดาในหมื่นโลกธาตุแสนโกฏิจักรวาลที่เป็นสัมมาทิฏฐินะ เอ้อ เราก็พูดไปสิ ผู้ที่ดูแลศาสนาร่วมกัน ผู้ที่เป็นอุบาสกอุบาสิการ่วมกันนะ เทวดาด้วยพรหมด้วย พวกพญาครุฑพวกพญานาคด้วย รวมกันนะพวกเรานี่ กราบไหว้พระพุทธเจ้าพระธรรมพระสงฆ์ร่วมกันนะ โสสุดโสเป็นโสตายสู้ร่วมกัน เมื่อเราเป็นอะไรไปก็ให้พวกเธอที่มีหูทิพย์ตาทิพย์ดูแลเราด้วย เพราะว่าเราเป็นกายหยาบ เราเป็นกายหยาบเราก็จะทำบุญให้ อุทิศส่วนบุญส่วนกุศลให้กับพวกเธอที่เป็นเทวดา เป็นพวกเทพพวกพรหม พวกพญาครุฑพญานาคทั้งหลายนะนี่รับบุญรับกุศลจากเรานะ เราเป็นเพื่อนกันนะ นั่น เราเป็นพุทธมามกะร่วมกันนะ นั่น มันก็เพื่อนกันรักสมัครสมานกลมเกลียวกัน อย่าทะเลาะกันสิลูกนั่น ที่เราเทศน์นี่เราไม่ได้เทศน์ให้ทะเลาะกันนะ แต่เราพูดตามธรรมตามวินัย พระพุทธเจ้าที่พระองค์เจตนาจริงๆ ก็คือเป็นที่พึ่งที่เลิศประเสริฐก็คือพระองค์ พระพุทธพระธรรมพระสงฆ์ อย่าเอาที่อื่นเป็นสรณะเลย นั่น เมื่อสัตว์โลกทราบก็รวมกันเป็นหนึ่งที่พระพุทธพระธรรมพระสงฆ์สิ นั่น..."

พระธรรมเทศนา : องค์หลวงปู่น้อย ญาณวโร
๑๙ พฤษภาคม ๒๕๖๓
วัดป่าห้วยริน จังหวัดขอนแก่น